Монголын эдийн засаг зах зээлийн мэдээ
“Финанс Монголиа 2013” санхүүгийн үзэсгэлэн болно
2013 оны 2 сарын 4
Өдрөөс өдөрт боловсронгуй болж байгаа санхүү, хөрөнгийн зах зээлийн талаар иргэдэд мэдээлэл өгөх зорилгоор “Дэлхийн худалдааны төв Улаанбаатар” ТББ, Санхүүгийн зохицуулах хороо, “Монголын хөрөнгийн бирж” ТӨХК болон “Мишээл групп” ХХК хамтран “Финанс Монголиа 2013” Монголын санхүүгийн анхдугаар үзэсгэлэн, сургалтыг удахгүй зохион байгуулахаар болжээ. Хоёрдугаар сарын 22-24-нд “Мишээл экспо танхим”-д зохион байгуулах үзэсгэлэнд брокер, дилерийн компаниуд, арилжааны банкууд, даатгалын компаниуд, аудитын байгууллагууд, хадгаламж зээлийн хоршоод, банк бус санхүүгийн байгууллагууд болон хөрөнгийн үнэлгээний итгэмжлэгдсэн байгууллага зэрэг хөрөнгө, санхүүгийн салбарын 90 гаруй байгууллага оролцох юм байна. Дээрх байгууллагууд өөрсдийн бүтээгдэхүүн үйлчилгээ санхүүгийн шийдлүүдийг танилцуулахын зэрэгцээ үнэгүй сургалт явуулах аж.
Д.ЦЭЭНЭ